Útgáfa upplýsingabæklings um fósturskimanir

Út er kominn upplýsingabæklingur um fósturskimun fyrir Downs-heilkenni. Að útgáfunni stendur Downs-félagið – Félag áhugafólks um Downs-heilkenni.

Á Íslandi fara um 80 prósent kvenna í fósturskimun fyrir Downs-heilkenni. Hlutfallið er með því hæsta í heiminum og hefur vakið mikla umræðu. Eftir að skimun fyrir Downs-heilkenni varð aðgengileg fyrir allar konur um síðustu aldamót hefur fæðingum einstaklinga með heilkennið fækkað til muna hér á landi. Staðreyndin er sú að á Íslandi er nærri öllum fóstrum sem greinast með Downs-heilkennið eytt og það vekur upp siðferðislegar spurningar.

Innleiðingunni fylgdi ekki nauðsynleg umræða í samfélaginu um það hvernig heilbrigðisstarfsfólk, foreldrar og aðrir aðstandendur bregðast við niðurstöðum skimunarinnar.

Það er ósk Downs-félagsins að með þessum upplýsingabæklingi fari mikilvæg umræða af stað og samfélagið geri sér grein fyrir því hvað liggur að baki slíkri skimun. Einstaklingar með Downs-heilkenni njóta almennt góðrar heilsu og lífsfyllingar í leik, námi og vinnu og Downs-heilkenni er hvorki sjúkdómur, röskun né læknisfræðilegt ástand.

Veitum verðandi foreldrum ráðrúm, tækifæri og þekkingu til að taka upplýsta, sameiginlega ákvörðun um það hvort fara eigi í skimun og hvað skuli gera með niðurstöður úr þeim.